Mark 14

Ísuna ámááyu-aimba siráan-kwasai.

Mátíyu 26:1-5, Árúku 22:1-2, Yóni 11:45-53

1Ísu mináímbá simátimuwana naaóváꞋó Áánútu Yútaa-kwaasi tíyótaasa í-tánómbá ímo intóráin-tantaakwara-pereti kwéagayon-kanaama ayúnkaraamba kauvónaumpo sésa kae-táwaima úwoi mésa mono-káwáá-kwáásíyé ámáámba sun-kwááíyé sésa nóraumaiya Ísumba aúpáꞋá tátoꞋmai inkamónaundayaꞋiyo. 2amápa-kwaasi ááiꞋa tíyáávainivo tanómbo kauvíyan-kanaaraꞋa íma tuvuwónaumne siráawe.

Ísumba áséi-masawemba pérankarain-kwasai.

Mátíyu 26:6-13, Yóni 12:1-8

3suwaná Ísu Pétáni-naopaꞋa koména moóráwai áwíꞋa Sáímonina naaúmpaꞋa áúma kárúkokovaaꞋa uréna ánásarowaina naaúmpaꞋa ména toómbá kwénowana moórá-ininko iyéna áséi-kwiyumba úm-basawemba anón-ontankakemba meéyámbakaim-basawemba maimaéna iyúmba minánávéúnkó óiꞋa móankaisuwena Ísu aꞋnómpímbá atímarowasa 4évakarawai keáímbá sésa áwááꞋa aéésa nóra séna mimbásáwémbá úwoi atíyankaiyo. 5mimbásáwémbó óꞋowimo timénamo anón-ontambo mairénamo ímo óísambo makáan-kwaasi tíméraambaniye sésa minínínkómbá áwááꞋa áúwana 6Ísu séna ivátuweꞋa íma áwááꞋa aééro. kaweꞋá umái pésinkaiye. 7ímo óísambo máráan-kwaasi keséma maíꞋmaiꞋa kwéiyaꞋa túwaꞋnaa ónáe séꞋa túwaꞋnaa ónááombanivo kemá keséma marapáꞋá íma maíꞋmaiꞋa ónaumne. 8minínínkómá kwená imáyáavinkemba kaweꞋá umái pésinkaiye. púwóndaraꞋa masawémba pésinkesa utamásinkanaaovo minínínkó áꞋa masawémba pésinkaiye. 9áraiꞋa súmpo maísááro. kesí áséi-aimba amápaꞋ-mapaꞋa kwésimatimewasa minínínkómá umásinkain-aimba kwésimatimiyasa táákaꞋa maránááowe Ísu siráiye.

Yútási Ísuna kuntaruꞋá mairáin-kwasai.

Mátíyu 26:14-16, Árúku 22:3-6

10súwana Ísuna kwayó-kwáásí sísamaivakemba kaeꞋá kumbaimái-kwaasivinkemba moóráwai áwíꞋa Yútási moórá-awiꞋa Isakéríóti mono-káwáá-kwáásítópaꞋa kwéna séna túwaꞋnaa onaꞋá Ísumba tátoranaaowe súwasa 11isésa aamoí kwéesa sésa mirámó inda-méyámbá óntanta aménaumne suwaná nóraumai Ísumba agaráátínkáanasa tátoranaao-imayaa ááimba ásámai uráiye.

tíyótaasa í-tánómbá kauráan-kwasai.

Mátíyu 26:17-25, Árúku 22:7-14, 21-23, Yóni 13:21-30

12Yútaa-kwaasi ímo intóráin-tantaakwara-pereti kwéagayon-kanaa túntemba tíyótaasa í-tánón-kánáá sipisípi-araaꞋa tuvúꞋmái kwégauvunkaꞋa kwená kwayó-kwáásí Ísumba taáísaa esa sésa náávara tíyótaasa í-tánómbá kogauvónaundayaꞋiyo suwaná 13kaeꞋá tiꞋmaréna séna Yérúsaremu-naopaꞋa kwíyana moóráwaimo nonánámó maimaénamo kwíndawaimba kóánaaemba kwáráakaiyo. 14kwemó naaúmpaꞋo iyínanamo naankó avowámó máyáinakai kosimámekai anóndakoma áísaa ena séna kesí kwayó-kwáásíyé náán-ayampara tíyótaasa í-tánómbá nánaumno kwésiye kosimámékaiyo. 15kwemá avóvomayaaꞋ-nankomba anón-ayampaꞋa agaráátinkaniye. kísuvuꞋo umándanaaon-tantaaꞋa mimpímbá kwáyáiye. amápa-tantaaꞋa arúsámarekai minkáꞋá kausínkáakaiyo súwasarai 16mindárai isésarai Yérúsaremu-naopaꞋa kwésarai Ísumo sún-tantaaꞋa kwáyowasarai minkáꞋá tanómba mágauwankaraaiye.

17tanómba mágaumakoyasa enónkaꞋa Ísu kwená kwayó-kwáásíyé mindáúmpáꞋá umésa 18toómbá kwémandesa uwaná Ísu séna keinárawapinkemba moóráwai keséya toómbá kwénaiwaima kembá namuro-kwáásíráꞋá agaráátinkaniye súwana 19tirunkó umbaí tówasa moórá-mora-umai áísaa esa sésa kewáꞋiyo sinté kuwaná 20Ísu séna moóráwai kwená toón-ayai maimaéna kesé moórá-taavepimba tuꞋmái náíndawai kwemá kembó namuro-kwáásíráꞋó agaráátinkaniwaiman-iye. 21naaóváꞋá Áánútun-aai aúváívimba agaimaréna séna kwaási úrandako kumpaáríndawai puwíníye siráintemba póꞋa púwónana namuro-kwáásíráꞋó agaráátinkaniwai sáwí-meyamba mayáníye. kwembó ímo maránkaraankakaankasi kaweꞋá isinó Ísu siráiye.

Ísu kwená kwayó-kwáásí toómbá tímakain-kwasai.

Mátíyu 26:26-30, 1 Kórínti 11:23-25

22súwasa toómbá kwénowana Ísu péréti maisoréna ÁánútumpaꞋa súwi séna topámbai tímatuwena séna mindá kesúman-ivo maimái naaró séna 23ándá-aran-dombo kwáyon-anaveumba maisoréna ÁánútumpaꞋa súwi séna timúwasa amáparawai nowaná séna mindá kesí naaemán-iye. 24kesí naaemá sáwívarawaiyavai kumínímba póna Áánútu kesé tarúmai máyáawe séna mináúná-áímbá simái tarúmakaiye. 25simátimeꞋa séꞋa ókwaraꞋa ándá-aran-domba íma nánaumpo Áánútu kwená kwaási kwégawaaipaꞋa méꞋa ándá-aran-domba aúná-nomba nánaumne Ísu súwasa 26Áánútuntavai ísámai monor-ímá simásuwesa mindáúmpáꞋá tuwésa Óríve-omapaꞋa iráawe.

Pítaa ánaaemba umásinkaniye siráin-kwasai.

Mátíyu 26:31-35, Árúku 22:31-34, Yóni 13:36-38

27Óríve-omapaꞋa umáyówana Ísu simátimena séna Áánútun-aai aúváívimba agaimaréna séna Áánútu séna

• sipisípiraꞋo kawááiwaimba tuvúwónana puwínasa
• sipisípiyomba kóyáwé ónááowe Áánútu siráiye

siráimba póna tááꞋa káínaꞋa siyuwéꞋa kóyáwé ónááowe. 28ánivo púwónasa utamásinkaiyaꞋa usásineꞋa kentí aivaꞋá Káríri-ayamapaꞋa konaꞋá kesínaaemba kónááowe Ísu súwana 29Pítaa séna amáparawai auwésa kóyáwé íyambanivo kemá íma mirá ónaumne súwana 30Ísu séna áraiꞋa simámeꞋa séꞋa ívéꞋ-noꞋwaamba kokórigo íma kaekáꞋá áái siráindaraꞋa emá kaumboráꞋá kentáváí se íma awánáúnda-kwaasiye síníyone Ísu Pítaantavai súwana 31Pítaa asiramái séna entémo sínkamonae íyaꞋo éꞋa íma auwéꞋa kónaumne súwasa kwená kwayó-kwáásí amápaꞋa mirá simásaraawe.

Ísu KétésémanivaꞋa námúnaa siráin-kwasai.

Mátíyu 26:36-46, Árúku 22:39-46

32amápaꞋa mirá simásuwesa Ísuwe kwená kwayó-kwáásíyé taai-kanáágúnéyómbá áwíꞋa KétésémanivaꞋa komésa Ísu simátimena séna maankáꞋá máyaiyaꞋa ÁánútumpaꞋa námúnaa kosénaumne séna 33Pítaawe Yémésiye Yóniye tíꞋmaena komáyowana umbai-yántáákómá arumbá sáwíꞋa kwéuwana 34simátimena séna kesirunkómá umbaiyé taisaꞋá póꞋa puwóraꞋnaraamba umái máyaumne. maankáꞋá méꞋa kárákwimai máéro séna 35tiyuwéna egwaaꞋá kwéna Áánútu anóndaꞋan-iye séna maraꞋá kumbaéna námúnaavinkemba séna kesivoó amápa-tantaaꞋa kanaán-umai kwéonda po kanaán-iye sémo e maanúmbáí-yántááꞋó kesópaꞋo tínímba maisiyuwéma ánivo kesí imáyáa íma kwarénaꞋa ená imáyáa kwáráano Ísu siráiye.

37Ísu námúnaa simásuwena kwená kwayó-kwáásíráútópaꞋa téna tayuwánómba tuún-kwaigurówana tayúsena Pítaantavena séna Sáímoniyo aún-kwaiguréma íma kanaaráꞋá sáwíyankaꞋa kárákwimai máyáane. 38Sáátáánigo tísaa umai isánáe-aimba kentópaꞋa síyáváínivo ÁánútumpaꞋa námúnaa seró. imáyáago kató isaná áúgomo umbaimó taimbá mindá aúgávaaꞋa kwéiye simásuwena 39moórágwaraꞋa tiyuwéna egwaaꞋá kwéna kéꞋnaamba ÁánútumpaꞋa námúnaa kosimásuwena 40kwená kwayó-kwáásítópaꞋa téna tayuwánómba tuún-kwaigurésa túgávaate kwéuwasa nóran-ainaꞋi. anondá íma simámuwana 41tiyuwéna kéꞋnaamba námúnaa kosimásuwena koyauweréna minkáúmbónárauyavai séna tuúmó kwaiguréꞋo máyáamba áꞋanivo kemá kwaási úrandakomba sáwíꞋo kwéon-kwaasiraꞋa agaráátinkainasa tátoranaaon-kanaa kwétivo 42usásinewata kwétiyapata konó. kembó agaráátinkaniwai kwétiye Ísu siráiye.

Ísumba tátokaan-kwasai.

Mátíyu 26:47-56, Árúku 22:47-53, Yóni 18:2-12

43Ísu mináímbá kwésuwana kwená kwayó-kwáásí sísamaivakemba kaeꞋá kumbaimái-kwaasivinkemba moóráwai áwíꞋa Yútási túmba kwesé sáwíva-kwaasi taánasatagwara ánáyatankwaraꞋa maimaésa tumbá mono-káwáá-kwáásíyé ámáámba sun-kwáásíyé Yútaa-anon-kwaasiye miwímá tiꞋmárówasa tumbá 44ááéma Yútási Ísumbo agaráátinkanintavai simátimena séna paruvará umánkáandawaimba tátoꞋmai áíꞋmaeꞋa tavíꞋmaeꞋa koró siráimba 45póna Yútási ÍsunopaꞋa téna séna anóndakoo máyaano kwésena paruvará kwéumankowasa 46kwesé tuwáí Ísumba tátórówana 47Ísuna kwayó-kwáásívínkémbá moóráwai taánasatama maimaéna aivaꞋ-mónó-káwáánákóná kwayó-kwáásígó ááꞋa agáúsuwowana 48tun-kwáásíyávéna séna kentáváí umóyán-kwáásímán-iye séꞋa póꞋa taánasatagwara ánáyatankwaraꞋa maimaéꞋa kembá tátoranae séꞋa kwétewe. 49sáwíva-tawai anóm-bonoꞋ-naumpaꞋa kesé méꞋa kesáái kwésimatimundaraꞋa íma kembá tátokaawe. naaóváꞋá Áánútun-aai aúváívimba agaimakáan-aimba kembó mirámó umásínkéneꞋa kwétewe súwasa 50kwená kwayó-kwáásí amápaꞋa inkaisésa auwésa kóyáwé uwasá tun-kwáásí Ísumba áíꞋmaesa kwéguwana 51moórá ívé-kwaasigo ampaantawé suꞋmai úsúrena Ísun-ánaaemba kwéguwasa tátorankowana 52ampaantamá kwatuwéna kwátóiyaaimba kuráiye.

anón-kwaasi Ísumba aaí simánkaraan-kwasai.

Mátíyu 26:57-68, Árúku 22:54-71, Yóni 18:13-24

53kúwasa Ísumba tátorowai áíꞋmaesa aivaꞋ-mónó-káwáánákóná naaúmpaꞋa móankesa mindáúmpáꞋá mono-káwáá-kwáásíyé Yútaa-anon-kwaasiye ámáámba sun-kwáásíyé torupamái máyón-daumpaꞋa móankowana 54Pítaa tínaaemba nénkaꞋa teémáyomba aivaꞋ-mónó-káwáánákóná máápar-ontavinkemba iréna naamaúvaꞋa ména i-kwáásíyé iraráꞋá koména irá kwégauviye.

55Pítaa irá kwégauvuwasa mono-káwáá-kwáásíyé Yútaa-anon-kwaasiye amáparawai Ísumba tuvuwíyana puwíní-ainkona ááimba avakáá-uwana íma kwáyowasa 56Ísuntavesa mósi-mesi-aimba sésa íma moórá-aimba suwasá 57évakarawai usásinesa kampaꞋá sésa 58kwemó sisatáámó isáúndaya anóm-bonoꞋ-namba kwaási uráan-damba tawísíyuweꞋa kaumbo-táwai kwaisuwéꞋa kwaásimo ímo íyan-damba ónaumne siráiye suwasá 59minkwáásí íma moórá-aimba suwaná 60aivaꞋ-mónó-káwáánákó usásinena Ísumba áísaa ena séna simánkáan-aimba anondá íya síníyono súwana 61Ísu iséna íma aaí súwana aivaꞋ-mónó-káwáánákó áísaa ena séna kesáámó áwíꞋo mósá maráúndawai ááninko e Áánútumo usásinankaiwai KáráísitiyaꞋona simásimiyo súwana 62Ísu séna kemá úne. suwánáínaꞋa kemá kwaási úrandako Áánútu asirayáwáímá ayáánúrapaꞋa asirayán-áyámpáꞋá uméꞋa ainámpímbá kumónaumne Ísu súwana 63aivaꞋ-mónó-káwáánákó arumbá sáwíꞋa kwéuwana kwená unáánkwátói tarátuwena séna Áánútumba akáꞋáámba simánkena kwesáváí simbá póta mináíntáváí aaivimbá mayankéta óꞋon-aimbo simánkáamba avakáá únda póta ivátá tuwéta 64Áánútumbo simáímo sáwíꞋo umánkáintavaiya nóraya ónaumno súwasa sáwíꞋan-ivo tuvuwíyana puwíno sésa 65Ísumba tuwirááíma kwirankésa aúrampaꞋa ampantanéí káátamakesa kwétuvuwesa sésa esáváí se Áánútu usásisinkaiwai úne séndawai ómpo kemá nááwa kwétuvuwuna simásimiyo kwésuwasa i-kwáásí áíꞋmai tiyáándei tuvúkáawe.

Pítaa íma awánáúnda-kwaasiye siráin-kwasai.

Mátíyu 26:69-75, Árúku 22:56-62, Yóni 18:15-27

66Pítaa naamaúvaꞋa ména iraráꞋá kwégauvuwana aivaꞋ-mónó-káwáánákóná kwayór-árásígó téna Pítaamba takarákéna séna Ísu Násáretivakewaise maéndawai óne súwana 68emó sénda-aimba sáákoma íma kaweꞋán-iye simásuwena máápar-ontavimba komáyowana 69minárásígó moórágwaraꞋa awánéna máyón-kwaasiyavena séna evíwána kwaásivinkendaꞋan-iye súwana 70moórágwaraꞋa Pítaa séna ímaniye simásuwena máyowasa sáwíyankaꞋa máyómba Pítaantavesa sésa áraita súne. KárírivakendaꞋa po kwená kwayó-kwáásívínkéndáꞋá óne suwaná 71Pítaa aikaꞋá maréna séna kampar-áímbó kwésenanamo éna Áánútu sínkaminiye. síyawaimba íma awánáúndanaꞋan-iye kwésuwana 72kokórigoma moórágwaraꞋa áái súwana Pítaa Ísumo simámun-aimba áákaꞋa maréna mirá siráinkaꞋa kokórigomo kaekáꞋó ááimo ímo siráindaraꞋa emá kaumboráꞋá kentáváí se íma awánáúnda-kwaasiman-iye síníyone siráimba mináímbá áákaꞋa maréna ávááraumai iviꞋá taráiye.